ഇന്ത്യന് ഫുട്ബോള് ( Indian Football Team ) ടീമിനെ ഒമ്പതാം സാഫ് ചാമ്പ്യന്ഷിപ്പ് ( SAFF Championship ) ട്രോഫിയില് എത്തിച്ചത് കേരള ബ്ലാസ്റ്റേഴ്സ് എഫ് സി ( Kerala Blasters F C ) കൈവിട്ടു കളഞ്ഞ താരമാണെന്ന് പറഞ്ഞാല് അവിശ്വസിക്കേണ്ട. 2023 സാഫ് ചാമ്പ്യന്ഷിപ്പ് ഫൈനല് നിശ്ചിത സമയത്തും അധിക സമയത്തും 1 – 1 സമനിലയില് കലാശിക്കുകയും പിന്നീല് ആദ്യ അഞ്ച് പെനാല്റ്റി കിക്കിലും 4 – 4 സമനില പാലിക്കുകയും ചെയ്തു. തുടര്ന്ന് അരങ്ങേറിയ സഡന് ഡെത്തിലെ ആദ്യ കിക്ക് ഇന്ത്യക്കായി ലക്ഷ്യത്തിലെത്തിച്ചത് നവോറം മഹേഷ് സിങ്.
കേരള ബ്ലാസ്റ്റേഴ്സ് എഫ് സി 2020 – 2022 കാലഘട്ടത്തില് സൈന് ചെയ്തെങ്കിലും സീനിയര് ടീമില് അരങ്ങേറാന് അവസരം നല്കാതിരുന്ന കളിക്കാരനാണ് ലെഫ്റ്റ് വിങറായ നവോറം മഹേഷ് സിങ്. 24 കാരനായ മണിപ്പൂര് താരം നേടിയ പെനാല്റ്റി ഗോളും ഗുര്പ്രീത് സിങ് നടത്തിയ കുവൈറ്റിന്റെ ആറാം പെനാല്റ്റി കിക്ക് രക്ഷപ്പെടുത്തലുമാണ് ഇന്ത്യയെ സാഫ് കിരീടത്തിലെത്തിച്ചത്.
ഇന്ത്യന് ഫുട്ബോള് രംഗത്തെ പുതിയ സെന്സേഷനായി മാറിയിരിക്കുകയാണ് നവോറം മഹേഷ് സിങ്. 2023 മാര്ച്ചിലാണ് നവോറം മഹേഷ് സിങ് ഇന്ത്യന് ദേശീയ ടീമില് ആദ്യമായി ഉള്പ്പെടുന്നത്. തമിഴ്നാട് താരമായ ശിവശക്തി നാരായണന് പരിക്കേറ്റ് പിന്മാറിയതോടെ ദേശീയ ക്യാമ്പിലേക്കുള്ള ടിക്കറ്റും നവോറം മഹേഷ് സിങിനു ലഭിച്ചു. മാര്ച്ച് 22 ന് മ്യാന്മറിനെതിരേ 70 -ാം മിനിറ്റില് ഇന്ത്യക്കായി രാജ്യാന്തര ഫുട്ബോളില് അരങ്ങേറി. തുടര്ന്ന് ഇന്ത്യന് ദേശീയ ടീമിലെ സ്ഥിരം സാന്നിധ്യമായി നവോറം മഹേഷ് സിങ് മാറിയെന്നതാണ് ശ്രദ്ധേയം.
ഇന്റര് കോണ്ടിനെന്റല് കപ്പില് വാനുവാടുവിനെതിരേ 90 മിനിറ്റും നവോറം മഹേഷ് സിങ് ഇന്ത്യക്കായി കളത്തിലുണ്ടായിരുന്നു. സാഫ് ചാമ്പ്യന്ഷിപ്പില് നേപ്പാളിനെതിരായ മത്സരത്തില് കന്നി രാജ്യാന്തര ഗോളും നവോറം മഹേഷ് സിങ് സ്വന്തമാക്കി. ഇന്ത്യക്കായി ഇതുവരെ 11 മത്സരങ്ങളില് ബൂട്ടണിഞ്ഞു, ഒരു ഗോള് നേടി.
നവോറം മഹേഷ് സിങിനെ വിട്ടു കളഞ്ഞത് കേരള ബ്ലാസ്റ്റേഴ്സ് എഫ് സി ചെയ്ത അബദ്ധമായെന്നാണ് ഇപ്പോഴത്തെ താരത്തിന്റെ പ്രകടനം വ്യക്തമാക്കുന്നത്. 2020 – 2022 കാലഘട്ടത്തില് നവോറം മഹേഷ് സിങ് ഇപ്പോഴത്തെ പ്രകടനം കാഴ്ച വെച്ചിരുന്നില്ല എന്നതും ശ്രദ്ധേയം. 2020 ല് ഐ ലീഗ് ക്ലബ്ബായ ഷില്ലോങ് ലാജോങ്ങില് നിന്നാണ് നവോറം മഹേഷ് സിങിനെ കേരള ബ്ലാസ്റ്റേഴ്സ് എഫ് സി സ്വന്തമാക്കിയത്. കേരള ബ്ലാസ്റ്റേഴ്സ് എഫ് സി ബി ടീമിനായി മൂന്ന് മത്സരങ്ങളില് ഒരു ഗോള് സ്വന്തമാക്കിയെങ്കിലും സീനിയര് ടീമിലേക്ക് ക്ഷണം ലഭിച്ചില്ല.
കേരള ബ്ലാസ്റ്റേഴ്സ് എഫ് സിയുടെ കരാറില് ആയിരിക്കേ ഐ ലീഗ് ക്ലബ്ബായ സുദേവ ഡല്ഹി എഫ് സിക്കും ഐ എസ് എല് ക്ലബ്ബായ ഈസ്റ്റ് ബംഗാളിനും വേണ്ടി ലോണ് വ്യവസ്ഥയില് കളിക്കേണ്ടിവന്നു നവോറം മഹേഷ് സിങിന്. 2021 – 2022 ല് ഈസ്റ്റ് ബംഗാള് ക്ലബ്ബിനായി 18 മത്സരങ്ങളില് രണ്ട് ഗോള് സ്വന്തമാക്കി. അതോടെ താരത്തിനെ സ്വന്തമാക്കാന് ഈസ്റ്റ് ബംഗാള് ക്ലബ് തീരുമാനിച്ചു.
2022 മുതല് ഈസ്റ്റ് ബംഗാള് ക്ലബ് താരമാണ് നവോറം മഹേഷ് സിങ്. ഈസ്റ്റ് ബംഗാളിനായി 42 മത്സരങ്ങളില് ഏഴ് ഗോളും ഏഴ് അസിസ്റ്റും നടത്തി. കേരള ബ്ലാസ്റ്റേഴ്സ് എഫ് സി യുടെ ഏറ്റവും വലിയ നഷ്ടമായി നവോറം മഹേഷ് സിങ് മാറുന്നതാണ് ഇപ്പോള് കാണുന്നത്.