ഒരു മാസത്തെ ഇടവേളയ്ക്ക് ശേഷം വെസ്റ്റിൻഡീസ് പര്യടനത്തോടെ ക്രിക്കറ്റ് മൈതാനത്തേക്ക് തിരിച്ചെത്തുകയാണ് ഇന്ത്യ. ടീമിന്റെ 2023-24 സീസണ് കൂടിയാണ് ഇതോടെ തുടക്കമാകുന്നത്. ഇന്ത്യൻ ക്രിക്കറ്റ് ടീമിനെ സംബന്ധിച്ചിടത്തോളം ഇനിയുള്ള കാലം ഏറെ തിരക്കുള്ളതായിരിക്കും. അത് കൊണ്ടു തന്നെ പല പുതുമുഖങ്ങളെയും അടുത്ത കുറച്ച് മാസങ്ങളിൽ ഇന്ത്യൻ ടീമിൽ കാണാം.
വെസ്റ്റിൻഡീസ് പര്യടനത്തിന് ശേഷം ഇന്ത്യ പോകുന്നത് അയർലൻഡിലേക്കായിരിക്കും. അവിടെ മൂന്ന് മത്സര ടി20 പരമ്പരയിലാണ് ഇന്ത്യ കളിക്കുക. വിൻഡീസ് പര്യടനത്തിന് പിന്നാലെയായതിനാലും ഏകദിന ലോകകപ്പ് വരാനിരിക്കുന്നതിനാലും ഈ പരമ്പരയിൽ നിന്ന് സീനിയർ താരങ്ങൾക്ക് ഇന്ത്യ വിശ്രമം അനുവദിച്ചേക്കും. നിലവിൽ ടി20 ടീമിന്റെ ക്യാപ്റ്റനായ ഹാർദിക് പാ‌ണ്ഡ്യയേയും സെലക്ടർമാർ അയർലൻഡ് പര്യടനത്തിൽ ഉൾപ്പെടുത്താൻ സാധ്യതയില്ല. അങ്ങനെ വന്നാൽ ആരാകും ഇന്ത്യയെ നയിക്കുക. അയർലൻഡ് പര്യടനത്തിനുള്ള ഇന്ത്യയുടെ സാധ്യത ടീമിനെ നോക്കാം
പരിക്കിനെത്തുടർന്ന് കഴിഞ്ഞ സെപ്റ്റംബർ മുതൽ കളിക്കളത്തിൽ നിന്ന് പുറത്താണ് ജസ്പ്രിത് ബുംറ. എന്നാൽ പരിക്കിൽ നിന്ന് സുഖം പ്രാപിച്ചു കൊണ്ടിരിക്കുന്ന താരം നിലവിൽ ബംഗളൂരുവിലെ നാഷണൽ ക്രിക്കറ്റ് അക്കാദമിയിൽ പരിശീലനം പുനരാരംഭിച്ചു കഴിഞ്ഞു. അയർലൻഡ് പര്യടനത്തിൽ താരം ടീമിലേക്ക് മടങ്ങിയെത്തുമെന്നാണ് റിപ്പോർട്ട്. നിലവിൽ ഇന്ത്യയുടെ നേതൃത്വ നിരയിലുള്ള താരമാണ് ബുംറ. ഇംഗ്ലണ്ടിനെതിരായ ടെസ്റ്റ് മത്സരത്തിൽ അദ്ദേഹം ഇന്ത്യയെ നയിച്ചിട്ടുമുണ്ട്. ഐറിഷ് പര്യടനത്തിൽ ഹാർദിക് കളിച്ചില്ലെങ്കിൽ അതുകൊണ്ടു തന്നെ ബുംറയെത്തേടി നായക സ്ഥാനം എത്തിയേക്കും.
നിലവിൽ ടീമിന്റെ പ്രധാന വിക്കറ്റ് കീപ്പർ ബാറ്ററായ ഇഷാൻ കിഷനും, റുതുരാജ് ഗെയിക്ക്വാദും ഐറിഷ് പര്യടനത്തിലും ഇന്ത്യയുടെ ഓപ്പണർമാരായെത്താനാണ് സാധ്യത. ഓപ്പണിങ്ങിൽ ഇവർക്ക് കൂട്ടായി യശസ്വി ജയ്സ്വാളും ടീമിൽ ഇടം പിടിച്ചേക്കും. അടുത്ത മാസം വെസ്റ്റിൻഡീസിനെതിരെ നടക്കാനിരിക്കുന്ന ടി20 പരമ്പരയ്ക്കുള്ള ഇന്ത്യൻ ടീമിലും യശസ്വി സ്ഥാനം പിടിച്ചിട്ടുണ്ട്. വെസ്റ്റിൻഡീസ് പര്യടനത്തിൽ ടീമിൽ നിന്ന് തഴയപ്പെട്ട രാഹുൽ ത്രിപാതിയും അയർലൻഡ് പര്യടനത്തിലൂടെ ടീമിൽ തിരിച്ചെത്തിയേക്കും.
ഈ വർഷത്തെ ഐപിഎല്ലിൽ മിന്നും പ്രകടനം കാഴ്ച വെച്ചിട്ടും റിങ്കു സിങ്ങിനെ വിൻഡീസ് ടി20 ക്കുള്ള ഇന്ത്യൻ ടീമിലുൾപ്പെടുത്താതിരുന്നത് ഇന്ത്യൻ ക്രിക്കറ്റിൽ വലിയ ചർച്ചാ വിഷയമായിരുന്നു. എന്നാൽ റിങ്കുവിന് അയർലൻഡ് പര്യടനത്തിൽ ടീമിലേക്ക് വിളി വന്നേക്കും. മലയാളി താരം സഞ്ജു സാംസണും ടീമിലെ പ്രധാന താരമാകും. പ്ലേയിങ് ഇലവനിൽ സുപ്രധാന പൊസിഷനായ നാലാം നമ്പരിൽ താരം കളിക്കാനാണ് സാധ്യത. ഐപിഎല്ലിൽ മിന്നും പ്രകടനം കാഴ്ച വെച്ചതിലൂടെ വിൻഡീസ് പര്യടനത്തിനുള്ള ടീമിൽ ഇടം പിടിച്ച തിലക് വർമ്മയും ഐറിഷ് പര്യടനത്തിൽ സ്ഥാനം നിലനിർത്തിയേക്കും
നിലവിൽ രാജ്യത്തെ സീനിയർ ഓൾ റൗണ്ടർമാരിലൊരാളായ കൃണാൽ പാണ്ഡ്യയും അയർലൻഡ് പര്യടനത്തിലൂടെ ഇന്ത്യൻ ടീമിലേക്ക് തിരിച്ചെത്തിയേക്കും. ഒപ്പം വാഷിങ്ടൺ സുന്ദറിനും വിളി വരുമെന്നാണ് സൂചനകൾ. ഈ പര്യടനത്തിൽ ഇന്ത്യയെ നയിക്കുമെന്ന് കരുതപ്പെടുന്ന വലം കൈയ്യൻ പേസർ ജസ്പ്രിത് ബുംറ തന്നെയാകും ബോളിങ് നിരയെ നയിക്കുക. അർഷ്ദീപ് സിങും, മോഹിത് ശർമ്മയും, ദീപക് ചഹറും പേസ് നിരയിൽ ബുംറയ്ക്ക് കൂട്ടായുണ്ടാകും. സ്പിന്നർമാരായി രവി ബിഷ്ണോയിയും, വരുൺ ചക്രവർത്തിയും ഇടം പിടിക്കാനാണ് സാധ്യത.
ഇഷാൻ കിഷൻ, റുതുരാജ് ഗെയിക്ക്വാദ്, യശസ്വി ജയ്സ്വാൾ, രാഹുൽ ത്രിപാതി, റിങ്കു സിങ്ങ്, വാഷിങ്ടൺ സുന്ദർ, തിലക് വർമ്മ, സഞ്ജു സാംസൺ, കൃണാൽ പാണ്ഡ്യ, ജസ്പ്രിത് ബുംറ, ദീപക് ചഹർ, മോഹിത് ശർമ്മ, വരുൺ ചക്രവർത്തി, അർഷ്ദീപ് സിങ്, രവി ബിഷ്ണോയ്.
