അബുദാബി: യുഎഇ പൗരന്‍മാര്‍ ഉപയോഗിക്കുന്ന വസ്ത്രം ധരിച്ച് ആഡംബര കാര്‍ ഷോറൂമിലെത്തി ഷോ കാണിച്ച ഏഷ്യന്‍ പൗരനെ ഫെഡറല്‍ പ്രോസിക്യൂഷന്‍ റിമാന്റ് ചെയ്തു. പണത്തിന് വില കല്‍പ്പിക്കാത്ത വിധത്തില്‍ ഇയാള്‍ അഹങ്കാരം കാണിക്കുന്ന വീഡിയോ കടയുടമ സമൂഹമാധ്യമങ്ങളില്‍ പങ്കുവച്ചിരുന്നു. യുഎഇ പൗരന്മാരെ അപഹസിക്കുന്നതാണ് വീഡിയോയെന്ന് ആക്ഷേപമുയര്‍ന്നതിനെ തുടര്‍ന്നാണ് നടപടി.
സമൂഹ മാധ്യമങ്ങളില്‍ വീഡിയോ വ്യാപകമായി പ്രചരിച്ചിരുന്നു.
അപകീര്‍ത്തികരമായ വീഡിയോ യുഎഇ അറ്റോര്‍ണി ജനറല്‍ ഓഫിസിലെ ഫെഡറല്‍ ബ്യൂറോ ഓഫ് ഇന്‍വെസ്റ്റിഗേഷന്‍സ് വിഭാഗം പരിശോധിച്ചു. പൊതുതാല്‍പര്യത്തിന് ഹാനികമായ വീഡിയോ ആണിതെന്ന് കണ്ടെത്തിയതിനെ തുടര്‍ന്നാണ് അറസ്റ്റ് ചെയ്തത്. രാജ്യത്തെ പൗരന്മാരെ അവഹേളിക്കുന്നതും സമൂഹമാധ്യമ നിയമങ്ങള്‍ ലംഘിക്കുന്നതുമാണിതെന്നും കണ്ടെത്തി.
കടയുടമ തന്നെയാണ് വീഡിയോ ചിത്രീകരിച്ചത്. കടയുടമയെ പബ്ലിക് പ്രോസിക്യൂഷന്‍ വിളിച്ചുവരുത്തി വിസ്തരിച്ചിരുന്നു. വീഡിയോ പൊതുജനത്തെ പ്രകോപിപ്പിക്കുന്നതും പൊതുതാല്‍പര്യത്തിന് ഹാനികരവുമാണെന്ന് അധികൃതര്‍ കണ്ടെത്തി. സോഷ്യല്‍ മീഡിയയില്‍ ദൃശ്യങ്ങള്‍ പങ്കുവയ്ക്കുമ്പോള്‍ നിയമപരവും ധാര്‍മികവുമായ നിയന്ത്രണങ്ങള്‍ പാലിക്കണമെന്നും സാമൂഹികമൂല്യങ്ങള്‍ മാനിക്കണമെന്നും ഫെഡറല്‍ ബ്യൂറോ ഓഫ് ഇന്‍വെസ്റ്റിഗേഷന്‍സ് വിഭാഗം ഓര്‍മിപ്പിച്ചു.
