ഫോക്സ്കോൺ എന്നറിയപ്പെടുന്ന തായ്‌വാൻ ആസ്ഥാനമായുള്ള ഹോൺ ഹായ് ടെക്‌നോളജി ഗ്രൂപ്പ്, വേദാന്ത ഗ്രൂപ്പുമായുള്ള സംയുക്ത സംരംഭത്തിൽ നിന്ന് പിൻമാറി. ഇന്ത്യയിൽ സെമി കണ്ടക്ടറുകൾ നിർമിക്കുന്ന സംരംഭത്തിൽ നിന്നാണ് പിൻമാറിയത്.
പരസ്പര ധാരണപ്രകാരമാണ് പിൻവാങ്ങൽ.
ഫോക്‌സ്‌കോണും വേദാന്തയും ചേർന്നുള്ള സംരംഭം ഇന്ത്യയുടെ സെമി കണ്ടക്ടർ വ്യവസായ രംഗത്തെ നിർണായക ശക്തിയായിരുന്നു. എന്നാൽ രണ്ട് സ്ഥാപനങ്ങളും ഗുജറാത്തിൽ 28 നാനോമീറ്റർ സെമികണ്ടക്ടറുകൾ നിർമ്മിക്കുന്ന പ്ലാൻറിൽ നിക്ഷേപം നടത്തും. ഇന്ത്യൻ സെമി കണ്ടക്ടർ വ്യവസായ മേഖലയിൽ നിന്ന് പൂർണമായും പിൻമാറുന്നില്ലെന്നും ഇന്ത്യൻ ഗവൺമെൻെറ ആഭ്യന്തര ചിപ്പ് നിർമ്മാണ പ്രവർത്തനങ്ങളെ ഇപ്പോഴും പിന്തുണയ്ക്കുന്നുണ്ടെന്നും ഫോക്സ്കോൺ വ്യക്തമാക്കിയിട്ടുണ്ട്
അതേസമയം വേദാന്ത മറ്റ് പങ്കാളികളുമായി മുന്നോട്ട് പോകുമെന്നാണ് സൂചന. കമ്പനി സെമികണ്ടക്ടർ മേഖല വളർത്തുന്നത് തുടരും. കൂടാതെ പ്രമുഖ ഇൻറഗ്രേറ്റഡ് ഡിവൈസ് മാനുഫാക്ചററിൽ നിന്ന് 40 നാനോമീറ്റർ സെമികണ്ടക്ടർ ഉത്പാദന സാങ്കേതികവിദ്യയ്ക്കുള്ള ലൈസൻസുണ്ടെന്നും കമ്പനി വ്യക്തമാക്കി. യുഎസ് ആസ്ഥാനമായ മൈക്രോൺ ഇന്ത്യയിൽ 270 കോടി ഡോളറിൻെറ സെമി കണ്ടക്ടർ വിതരണ പ്ലാന്റ് നിർമ്മിക്കുമെന്ന് സർക്കാർ കഴിഞ്ഞ മാസം പ്രഖ്യാപിച്ചിരുന്നു.
വേദാന്തയുമായുള്ള സംയുക്ത സംരംഭത്തിൽ നിന്ന് ഫോക്സ്കോൺ പിൻവാങ്ങിയത് ഇന്ത്യയുടെ സെമി കണ്ടക്ടർ വ്യവസായ രംഗത്തെ ബാധിക്കില്ലെന്ന് ഇലക്‌ട്രോണിക്‌സ് ആൻഡ് ഇൻഫർമേഷൻ ടെക്‌നോളജി സഹമന്ത്രി രാജീവ് ചന്ദ്രശേഖർ വ്യക്തമാക്കി. രണ്ട് കമ്പനികൾക്കും ഇന്ത്യയിൽ സ്വതന്ത്രമായി പ്രവർത്തിക്കാൻ ആകുമെന്നും ചന്ദ്രശേഖർ പറഞ്ഞു. വേദാന്ത ഓഹരികളിലെ ഇടിവ് തുടരുന്നു. ഇന്ന് 276.25 രൂപയിലാണ് ഓഹരി വില.
