തിരുവനന്തപുരം: മുതലപ്പൊഴിയിൽ മന്ത്രിമാരെ തടഞ്ഞ സംഭവത്തിൽ ലത്തീൻ അതിരൂപത വികാരി ജനറൽ ഫാ. യൂജിൻ പെരേര അടക്കം അൻപതിലധികം പേർക്കെതിരെ അഞ്ചുതെങ്ങ് പോലീസ് കേസെടുത്തു. മന്ത്രിമാരെ തടഞ്ഞതിനും കലാപാഹ്വാനത്തിനുമാണ് പോലീസ് കേസെടുത്തത്. ഫാ. യൂജിൻ പെരേരക്കെതിരെ കലാപാഹ്വാനത്തിനും കണ്ടാലറിയാവുന്ന അൻപതിലധികം പേർക്കെതിരെ റോഡ് ഉപരോധിച്ചതിനുമാണ് കേസ് രജിസ്റ്റർ ചെയ്തത്. പ്രതിഷേധം നേരിട്ട മന്ത്രി വി ശിവൻകുട്ടി ഫാ. യൂജിൻ പെരേരക്കെതിരെ പരസ്യമായി രംഗത്തുവന്നിരുന്നു. ഇതിനു പിന്നാലെയാണ് പോലീസ് നടപടി
മുതലപ്പൊഴിയിൽ മത്സ്യബന്ധന വള്ളം മറിഞ്ഞ് ഒരു മത്സ്യത്തൊഴിലാളി മരണപ്പെടുകയും മൂന്നുപേരെ കാണാതാകുയും ചെയ്ത സംഭവത്തിലാണ് സ്ഥലം സന്ദർശിക്കാൻ എത്തിയ മന്ത്രിമാരായ വി ശിവൻകുട്ടി, അഡ്വ. ആന്റണി രാജു, അഡ്വ. ജിആർ അനിൽ എന്നിവരെ നാട്ടുകാർ തടഞ്ഞത്. തർക്കത്തിനിടെ ഫാ. യൂജിൻ പേരേരയോട് മന്ത്രി വി ശിവൻകുട്ടി ഷോ കാണിക്കരുതെന്ന് പറഞ്ഞതു നാട്ടുകാരെ പ്രകോപിതരാക്കി. ഇതോടെ സംഭവസ്ഥലത്തുനിന്ന് മടങ്ങിയ മന്ത്രിമാർ ഫാ. യൂജിൻ പെരേരക്കെതിരെ രംഗത്തുവരികയായിരുന്നു.
മുതലപ്പൊഴിയിൽ എത്തിയ മന്ത്രിമാരെ തടയാൻ ആഹ്വാനം ചെയ്ത് ഫാ. യൂജിൻ പേരേര ആണെന്നു മന്ത്രിമാർ വാർത്താക്കുറിപ്പിൽ ആരോപിച്ചു. ആഹ്വാനം അനുസരിക്കാതെ നാട്ടുകാർ സംയമനം പാലിച്ചതിനാൽ വലിയ സംഘർഷം ഒഴിവായെന്ന് മന്ത്രിമാർ വാർത്താക്കുറിപ്പിൽ പറഞ്ഞു.
സംഭവത്തിൽ വാർത്താസമ്മേളനം നടത്തിയ മന്ത്രി വി ശിവൻകുട്ടി, ഫാ. യൂജിൻ പേരേര, ബിഷപ്പ് തോമസ് നെറ്റോ എന്നിവർക്കെതിരെ ഗുരുതര ആരോപണം ഉന്നയിച്ചു. മന്ത്രിമാർക്കുനേരെ അലറിയടുത്ത ഫാ. പെരേര മന്ത്രിമാരെയും കളക്ടറെയും തടയാൻ ആഹ്വാനം ചെയ്തുവെന്നായിരുന്നു ശിവൻകുട്ടിയുടെ ആരോപണം. അതേസമയം മന്ത്രിമാർ മത്സ്യത്തൊഴിലാളികളോട് കയർത്തുസംസാരിച്ചുവെന്നാണ് ഫാ. യുജീൻ പേരേരയുടെ വാദം.
