കെയ്റോ: മയക്കുമരുന്ന് ഉപയോഗവും വിതരണവും അവയുടെ രാജ്യത്തേക്കുള്ള കള്ളക്കടത്തും ചെറുക്കാനുള്ള ശ്രമങ്ങള്‍ കൂടുതല്‍ ശക്തമാക്കി കുവൈറ്റ്. മയക്കു മരുന്നുമായി ബന്ധപ്പെട്ട കേസുകളില്‍ കോടതികള്‍ കഴിഞ്ഞ വര്‍ഷം മയക്കു മരുന്ന് വ്യാപാരികള്‍ക്കെതിരെ ശരാശരി പ്രതിമാസം ഒരു വധശിക്ഷ വീതം വിധിച്ചുവെന്ന് റിപ്പോര്‍ട്ടുകള്‍ വ്യക്തമാക്കി. മയക്കു മരുന്ന് കള്ളക്കടത്ത്, വ്യാപാരം എന്നിവയുമായി ബന്ധപ്പെട്ട കേസുകളില്‍ കുവൈറ്റ് കോടതിയില്‍ കഴിഞ്ഞ വര്‍ഷം 12 പേരെയാണ് തൂക്കിലേറ്റാന്‍ വിധിച്ചതെന്ന് ജുഡീഷ്യല്‍ സ്ഥിതി വിവര കണക്കുകള്‍ ഉദ്ധരിച്ച് അല്‍ ഖബസ് പത്രം റിപ്പോര്‍ട്ട് ചെയ്തു.
ഇങ്ങനെ വധ ശിക്ഷയ്ക്ക് വിധിക്കപ്പെട്ട പ്രതികളില്‍ മൂന്ന് പേര്‍ വീട്ടു പറമ്പുകളിലും മറ്റും മയക്കുമരുന്ന് വളര്‍ത്തുകയും വ്യാപാരം ലക്ഷ്യമാക്കി മയക്കുമരുന്ന് സംസ്‌കരണം നടത്തുകയും ചെയ്തവരായിരുന്നു. ബാക്കിയുള്ളവര്‍ അന്താരാഷ്ട്ര സംഘങ്ങളുമായി ഒത്തുചേര്‍ന്ന് രാജ്യത്തേക്ക് മയക്കുമരുന്ന് കടത്തിയതിനും കൈവശം വച്ചതിനും ശിക്ഷിക്കപ്പെട്ടു. കണക്കുകള്‍ പ്രകാരം, ഈ കാലയളവില്‍ മയക്കുമരുന്ന് കടത്ത് ആരോപിച്ച് മറ്റ് 59 കുറ്റവാളികള്‍ ജീവപര്യന്തം തടവിന് ശിക്ഷിക്കപ്പെട്ടു. മയക്കുമരുന്ന് നട്ടുപിടിപ്പിച്ചതിന് മറ്റ് എട്ട് പ്രതികളും കച്ചവടം ലക്ഷ്യമിട്ട് മയക്കുമരുന്ന് കൈവശം വച്ചതിനും കൊണ്ടുവന്നതിനും 32 പ്രതികളും വിവിധ കേസുകളിലായി ശിക്ഷിക്കപ്പെടുകയുണ്ടായി. മറ്റൊരു കേസില്‍ പന്ത്രണ്ട് പേര്‍ മയക്കുമരുന്ന് കൈവശം വച്ചതിന് ശിക്ഷിക്കപ്പെട്ടു. നാല് പേര്‍ സൈക്കോട്രോപിക് മയക്കുമരുന്ന് കൈവശം വച്ചതിന് കുറ്റത്തിനും മൂന്ന് പ്രതികള്‍ മയക്കുമരുന്ന് ഉപയോഗിച്ചതിനും ശിക്ഷിക്കപ്പെട്ടു.
മയക്കു മരുന്നുമായി ബന്ധപ്പെട്ട കേസുകളില്‍ കുവൈറ്റ് കോടതികള്‍ കഴിഞ്ഞ വര്‍ഷം 6,911 വിധികള്‍ പുറപ്പെടുവിച്ചതായി കണക്കുകള്‍ പറയുന്നു. അവയില്‍ 6,034 കേസുകളിലും പ്രതികള്‍ക്കെതിരായ കുറ്റം തെളിയിക്കപ്പെടുകയും അവര്‍ക്ക് ശിക്ഷ വിധിക്കുകയും ചെയ്തു. 877 കേസുകളില്‍ മാത്രമാണ് പ്രതികള്‍ കുറ്റ വിമുക്തരാക്കപ്പെട്ടത്. കുവൈറ്റ് പോലിസ് മയക്കുമരുന്നു കേസുകള്‍ അന്വേഷിക്കുന്നതിലും പ്രതികളെ പിടികൂടുന്നതിലും തൊണ്ടി മുതലുകള്‍ പിടിച്ചെടുക്കുന്നതിലും പ്രകടിപ്പിച്ച പ്രൊഫഷനലിസവും കാര്യ ക്ഷമതയുമാണ് ഉയര്‍ന്ന ശിക്ഷാ നിരക്ക് വ്യക്തമാക്കുന്നതെന്ന് നിയമവിദഗ്ധര്‍ ചൂണ്ടിക്കാട്ടി. കഴിഞ്ഞ ദിവസം 160 കിലോഗ്രാം ഹാഷിഷ് രാജ്യത്തേക്ക് കടത്താനുള്ള ശ്രമം പരാജയപ്പെടുത്തിയതായി കുവൈറ്റ് ആഭ്യന്തര മന്ത്രാലയം കഴിഞ്ഞയാഴ്ച പ്രഖ്യാപിച്ചിരുന്നു. സംഭവത്തില്‍ നാലു പേരെ പോലിസ് അറസ്റ്റ് ചെയ്തിരുന്നു.
