ന്യൂഡൽഹി: ഞെട്ടിക്കാൻ ഒരുങ്ങുകയാണ് ഇന്ത്യൻ റെയിൽവേയുടെ സ്വപ്ന പദ്ധതികളിലൊന്നായ ബുള്ളറ്റ് ട്രെയിൻ പദ്ധതി. മുംബൈയെ ഗുജറാത്തിലെ അഹമ്മദാബാദുമായി ബന്ധിപ്പിക്കുന്ന രാജ്യത്തെ ആദ്യത്തെ അതിവേഗ റെയിൽ ഇടനാഴിയുടെ നിർമാണ പ്രവൃത്തികൾ അതിവേഗത്തിലാണ് പുരോഗമിക്കുന്നത്. ഇന്ത്യൻ റെയിൽവേയുടെ തലവര മാറ്റിമറിക്കുന്നതാകും ബുള്ളറ്റ് ട്രെയിൻ പദ്ധതിയെന്നാണ് വിലയിരുത്തൽ. 2026 – 2027 ഓടെ ബുള്ളറ്റ് ട്രെയിൻ ട്രാക്കിലെത്തുമെന്ന സൂചനയാണ് കേന്ദ്ര സർക്കാർ നൽകുന്നത്. 2026ൽ പദ്ധതി പൂർത്തിയാകുമെന്നും ബുള്ളറ്റ് ട്രെയിൻ പാളത്തിലെത്തുമെന്നും കേന്ദ്ര റെയിൽവേ മന്ത്രി അശ്വിനി വൈഷ്ണവ് വ്യക്തമാക്കിയിരുന്നു.
ബാന്ദ്ര കുർള കോംപ്ലക്സിൽ ഭൂഗർഭ സ്റ്റേഷൻ്റെയും ഭൂഗർഭ റെയിൽ തുരങ്കപാതയുടെയും നിർമാണ പ്രവൃത്തികൾ അന്തിമഘട്ടത്തിലേക്ക് അടുക്കുകയാണ്. തുരങ്കത്തിൻ്റെ നിർമാണം ഇപ്പോൾ താനെ ക്രീക്കിൻ്റെ മുഖത്തേക്ക് നീങ്ങുകയാണ്. ഇതിൻ്റെ ഒരു ഭാഗം ക്രീക്കിന് താഴെയായി കടന്നുപോകും. ഇന്ത്യയുടെ ആദ്യത്തെ കടലിനടിയിലൂടെയുള്ള റെയിൽ തുരങ്കമായി ഇത് മാറും. 21 കിലോമീറ്റർ നീളമുള്ള തുരങ്കത്തിന് 110 മീറ്റർ ഉയരമുണ്ടാകും.
താനെ ക്രീക്കിൻ്റെ അടിയിൽ നിന്ന് ഏകദേശം 25 – 30 മീറ്റർ ആഴത്തിലാണ് തുരങ്കമുള്ളതെന്ന് നാഷണൽ ഹൈ സ്പീഡ് റെയിൽ കോർപ്പറേഷൻ ലിമിറ്റഡ് അധികൃതർ അറിയിച്ചു. സങ്കീർണ മേഖലയായതിനാൽ ഓസ്ട്രിയൻ ടണലിങ് രീതി ഉപയോഗിച്ചാണ് ഇവിടെ നിർമാണ പ്രവൃത്തികൾ തുടരുന്നത്. എല്ലാവിധ സുരക്ഷാ സംവിധാനങ്ങളോടെയുമാണ് നിർമാണം പുരോഗമിക്കുന്നത്. മണ്ണിലെ ഏതെങ്കിലും മാറ്റങ്ങൾ, ഭൂകമ്പ സാധ്യതകൾ, തുരങ്കത്തിൻ്റെ ബലം ഉൾപ്പെടെയുള്ളവ പരിശോധിക്കാനും നിരീക്ഷിക്കാനും നിരവധി നിരീക്ഷണ ഉപകരണങ്ങൾ ടണലിൽ സ്ഥാപിച്ചിട്ടുണ്ട്. ഇവയിൽ നിന്നുള്ള തത്സമയ അപ്‌ഡേറ്റുകൾ ലഭ്യമാക്കാൻ സെർവറുമായി ബന്ധിപ്പിച്ചിട്ടുണ്ട്.
വരുന്ന ഡിസംബറോടെ തുരങ്കത്തിൻ്റെ പ്രവൃത്തികൾ പൂർത്തിയാകുമെന്നാണ് വിലയിരുത്തൽ. ടണൽ ബോറിങ് പ്രവൃത്തികൾ വേഗത്തിലാക്കാൻ മൂന്ന് വലിയ ടണൽ ബോറിങ് മെഷീനുകൾ എത്തിക്കും. മുംബൈ – അഹമ്മദാബാദ് ബുള്ളറ്റ് ട്രെയിനിൻ്റെ നിർമാണ പ്രവൃത്തികൾ പുരോഗമിക്കുകയാണ്. മഹാരാഷ്ട്രയിലേക്കാൾ വേഗത്തിലാണ് ഗുജറാത്തിൽ നിർമാണ പ്രവൃത്തികൾ നടക്കുന്നത്. ഗുജറാത്തിലൂടെയുള്ള 352 കിലോമീറ്റർ ഭാഗത്തെ നിർമാണം 2026 ഓഗസ്റ്റിൽ പൂർത്തിയായേക്കും. മുംബൈ വരെ ശേഷിക്കുന്ന ഭാഗം 2028 അവസാനത്തോടെ തുറക്കുമെന്നാണ് പ്രതീക്ഷിക്കുന്നത്. ജാപ്പനീസ് സാങ്കേതിക വിദ്യയിലാണ് ബുള്ളറ്റ് ട്രെയിൻ സഞ്ചരിക്കുക. 1.08 ലക്ഷം കോടി രൂപയാണ് മുംബൈ – അഹമ്മദാബാദ് ബുള്ളറ്റ് ട്രെയിൻ പദ്ധതിക്കായി വകയിരുത്തിയിരിക്കുന്നത്. ജപ്പാൻ്റെ സാമ്പത്തിക സഹായം പദ്ധതിക്കുണ്ട്.
