ഇടുക്കി: മുല്ലപ്പെരിയാർ ഡാമിലെ ജലനിരപ്പ് 152 അടിയാക്കുമെന്ന് തമിഴ്നാട് ഗ്രാമവികസന, തദ്ദേശ ഭരണ വകുപ്പ് മന്ത്രി ഐ പെരിയസ്വാമി. മുല്ലപ്പെരിയാർ അണക്കെട്ടിലെ ജലനിരപ്പ് 152 അടിയായി ഉയർത്തുകയെന്നത് തമിഴ്‌നാടിൻ്റെ സ്വപ്നമാണ്. ഡിഎംകെ സർക്കാർ അത് യാഥാർഥ്യമാക്കുമെന്നും മന്ത്രി പറഞ്ഞു.
സുപ്രീം കോടതി വിധി പ്രകാരം മുല്ലപ്പെരിയാർ ഡാമിൻ്റെ അറ്റകുറ്റപ്പണികൾ നടത്താൻ തമിഴ്നാടിന് അവകാശമുണ്ട്. തമിഴ്നാടിന് അവകാശപ്പെട്ട ഒരുപിടി മണ്ണും വിട്ടുകൊടുക്കില്ലെന്നും പെരിയസാമി പറഞ്ഞു. വൈക്കം സന്ദർശനത്തിനിടെ തമിഴ്നാട് മുഖ്യമന്ത്രി കേരള മുഖ്യമന്ത്രിയുമായി ഇക്കാര്യം ചർച്ച ചെയ്യാൻ തീരുമാനിച്ചതായും മന്ത്രി അറിയിച്ചു. തേനി ജില്ലയിലെ മഴക്കെടുതികൾ വിലയിരുത്തിയ ശേഷമായിരുന്നു മന്ത്രിയുടെ പ്രതികരണം.
അതേസമയം മുല്ലപ്പെരിയാർ ഡാമിലെ ജലനിരപ്പ് 152 അടിയാക്കുമെന്ന തമിഴ്നാട് മന്ത്രി ഐ പെരിയസ്വാമിയുടെ പ്രസ്താവന ഏതടിസ്ഥാനത്തിലാണെന്ന് മനസ്സിലാകുന്നില്ലെന്ന് മന്ത്രി റോഷി അഗസ്റ്റിൻ പറഞ്ഞു. നിലവിൽ സുപ്രീം കോടതിയുടെ പക്കലാണ് കേസുള്ളത്. 142 അടിവരെ ജലനിരപ്പ് ഉയർത്തിനിർത്താനാണ് നിലവിൽ സാധിക്കുക. അത് അങ്ങനെ നിലനിൽക്കുന്നത് റൂൾ കർവിൻ്റെ അടിസ്ഥാനത്തിലാണ്. പാട്ടക്കരാറിന് പുറത്തുള്ള കേരളത്തിൻ്റെ ഒരിഞ്ച് ഭൂമി പോലും വിട്ടുകൊടുക്കുന്ന പ്രശ്നം ഉദിക്കുന്നില്ല. അതിനേക്കുറിച്ച് ഒരുതരത്തിലുള്ള ആലോചനയില്ലെന്നും മന്ത്രി വ്യക്തമാക്കി.
