ഇന്ത്യൻ സൂപ്പർ ലീഗ് ( ഐ എസ് എൽ ) ഫുട്ബോൾ ക്ലബ്ബായ കേരള ബ്ലാസ്റ്റേഴ്സ് എഫ് സി പുതിയ മുഖ്യ പരിശീകനെ കണ്ടെത്താനുള്ള ശ്രമത്തിൽ. സ്വീഡിഷ് മുഖ്യ പരിശീലകനായിരുന്ന മിക്കായേൽ സ്റ്റാറെ കേരള ബ്ലാസ്റ്റേഴ്സ് എഫ് സി വിട്ടതോടെയാണ് പുതിയ കോച്ചിനെ കണ്ടെത്താൻ ക്ലബ് നിർബന്ധിതമായത്.
ഐ എസ് എൽ 2024 – 2025 സീസണിൽ കേരള ബ്ലാസ്റ്റേഴ്സ് എഫ് സി യുടെ മോശം പ്രകടനത്തിന്റെ പേരിൽ ക്ലബ് മിക്കായേൽ സ്റ്റാറെയെ പുറത്താക്കുകയായിരുന്നു എന്നതാണ് വാസ്തവം. ഈ ഐ എസ് എൽ സീസണിൽ ഇതുവരെ 12 മത്സരങ്ങൾ കളിച്ച കേരള ബ്ലാസ്റ്റേഴ്സ് എഫ് സിക്ക് 11 പോയിന്റ് മാത്രമാണ് നേടാൻ സാധിച്ചത്. നിലവിൽ ലീഗ് പോയിന്റ് ടേബിളിൽ 10 -ാം സ്ഥാനത്തുമാണ് അവർ. ആദ്യ ആറു സ്ഥാനക്കാർക്കു മാത്രമേ പ്ലേ ഓഫ് ടിക്കറ്റ് ലഭിക്കുകയുള്ളൂ എന്നതാണ് വാസ്തവം.
16 മത്സരങ്ങൾ മാത്രമാണ് മിക്കായേൽ സ്റ്റാറെ കേരള ബ്ലാസ്റ്റേഴ്സ് എഫ് സിക്ക് ഒപ്പം ഉണ്ടായിരുന്നത്. ഐ എസ് എല്ലിൽ 12 ഉം ഡ്യൂറൻഡ് കപ്പിൽ നാലും അടക്കമാണിത്. ഐ എസ് എല്ലിൽ മൂന്നു ജയം മാത്രമാണ് കേരള ബ്ലാസ്റ്റേഴ്സ് എഫ് സി ഇതുവരെ നേടിയത്. സെർബിയൻ മുഖ്യ പരിശീലകനായ ഇവാൻ വുകോമനോവിച്ചിനെ ഒഴിവാക്കിയായിരുന്നു കേരള ബ്ലാസ്റ്റേഴ്സ് എഫ് സി മിക്കായേൽ സ്റ്റാറെയെ എത്തിച്ചത്. ഇവാൻ വുകോമനോവിച്ചിന് കേരള ബ്ലാസ്റ്റേഴ്സ് എഫ് സി യിൽ ഒരു സീസൺ കൂടി കരാർ അവശേഷിക്കുന്നുണ്ടായിരുന്നു എന്നതും വാസ്തവം.
മിക്കായേൽ സ്റ്റാറെ ഒഴിവായതോടെ തൽസ്ഥാനത്ത് ഇവാൻ വുകോമനോവിച്ച് എത്തുമെന്ന് കേരള ബ്ലാസ്റ്റേഴ്സ് എഫ് സി ആരാധകർ പ്രതീക്ഷിച്ചു. എന്നാൽ, ഇവാൻ വുകോമനോവിച്ച് കേരള ബ്ലാസ്റ്റേഴ്സിലേക്ക് തിരിച്ച് എത്തില്ല എന്നാണ് റിപ്പോർട്ടുകൾ സൂചിപ്പിക്കുന്നത്. കേരള ബ്ലാസ്റ്റേഴ്സ് എഫ് സി യുടെ ചരിത്രത്തിലെ ഏറ്റവും മികച്ച പരിശീലകരിൽ മുൻപന്തിയിലാണ് ഇവാൻ വുകോമനോവിച്ചിൻറെ സ്ഥാനം.
