ചെന്നൈ: അറ്റകുറ്റപ്പണികൾ നടക്കുന്നതിനാൽ ചെന്നൈയിലെ നാൽപ്പതിലധികം ഭാഗങ്ങളിൽ നാളെ (വെള്ളിയാഴ്ച / 20-12-2024) ഭാഗികമായി വൈദ്യുതി മുടങ്ങും. തമിഴ്‌നാട് ജനറേഷൻ ആൻഡ് ഡിസ്ട്രിബ്യൂഷൻ കോർപറേഷൻ അറ്റകുറ്റപ്പണികൾ നടത്തുന്നതിനാൽ വിവിധയിടങ്ങളിൽ അഞ്ച് മണിക്കൂറോളം വൈദ്യുതി മുടങ്ങുമെന്ന് വൈദ്യുതി വകുപ്പ് അറിയിച്ചു.
രാവിലെ ഒൻപത് മണിമുതൽ രണ്ടുമണിവരെയാണ് വിവിധയിടങ്ങളിൽ വൈദ്യുതി മുടങ്ങുക. നിശ്ചിത സമയത്തിനുള്ളിൽ അറ്റകുറ്റപ്പണികൾ പൂർത്തിയാക്കി വൈദ്യുതി വിതരണം പുനരാരംഭിക്കാനാണ് ശ്രമമെന്ന് അധികൃതർ വ്യക്തമാക്കി. അറ്റകുറ്റപ്പണികൾ നീണ്ടാൽ വൈദ്യുതി വിതരണം പുനസ്ഥാപിക്കുന്നതിൽ താമസമുണ്ടാകും.
മണാലി ന്യൂ ടൗൺ, വിചൂർ സിഡ്കോ എസ്റ്റേറ്റ്, കുളക്കരൈ, ഐജെ പുരം, എഴിൽ നഗർ, ഗണപതി നഗർ, ശ്രീറാം നഗർ, അരുൾമുരുകൻ നഗർ, വെള്ളിവോയൽ, നാപാളയം, ഇടയഞ്ചാവടി, വെള്ളിവോയൽ ചാവടി, കൊണ്ടകരൈ, എക്കൽ കോളനി, പൊന്നിയമ്മൻ നഗർ, സെമ്മനലി, എംആർഎഫ് നഗർ, സുബ്രമണി നഗർ എന്നീ റസിഡൻഷ്യൽ ഏരിയകളിൽ വൈദ്യുതി തടസ്സപ്പെടും.
തുവ്വക്കുടി സബ്‌സ്റ്റേഷനിൽ പ്രതിമാസ അറ്റകുറ്റപ്പണികൾ നടക്കുന്നതിനാൽ ട്രിച്ചി (തിരുച്ചിറപ്പള്ളി) ജില്ലയിലെ വിവിധയിടങ്ങളിലും നാളെ വൈദ്യുതി വിതരണം തടസ്സപ്പെടും. ട്രിച്ചിയിലെ വിവിധ നഗര പ്രദേശങ്ങളിൽ ഡിസംബർ 20 വെള്ളിയാഴ്ച വൈദ്യുതി വിതരണം തടസ്സപ്പെടുമെന്ന് അധികൃതർ അറിയിച്ചു.
